Umsagnir farþega

Að ferðast með Afríku Ævintýraferðum um Afríku/Kenya er mjög gefandi, því fararstjórarnir þekkja vel land og þjóð. Einnig finnur maður sig öruggan í þeirra umsjá. Ferðirnar sem ég hef farið hafa gefið mér nýja sýn á marga hluti.

Ferð mín til Afríku og gangan uppá Kilimanjaro heppnaðist stórkostlega. Það er ekki síst að þakka vandaðri skipulagningu Elínar og Borgars í Afríku-Ævintýraferðum. Ég gef þeim hiklaust mín bestu meðmæli. Allt stóðst eins og stafur á bók og gott betur. Svo eru þau líka svo ljómandi skemmtileg.

Við fórum til Afríku af því okkur langaði að sjá meira af dýralífinu og mannlífinu sem hafði vakið forvitni okkar. Langaði að sjá dýrin í sínu rétta umhverfi. Við fórum til Kenya september 2004 og í febrúar 2008 til Uganda og Rwanda. Við getum ekki gert upp á milli þeirra landa sem við höfum farið til, þau hafa öll sinn sjarma hvert á sinn hátt. Það er erfitt að svara því hvað heillar mest, bara allt. Náttúrufegurðin, mannlífið, tímaleysið, dýralífið. Allt er svo framandi og frábrugðið því sem maður er að upplifa og fást við daglega. Fararstjórnin var hreint óaðfinnanleg í bæði skiptin, Borgar Þorsteinsson var fararstjóri í fyrri ferðinni, hann var frábær fararstjóri, hann er duglegur að miðla upplýsingum og fróðleik um land og þjóð og um það sem fyrir augu bar. Og ekki síður hvað honum tekst að láta manni líða vel og finna til öryggiskenndar. Elín Þorgeirsdóttir var fararstjóri í seinni ferðinni, henni tekst með glettni og góða skapinu að kalla allt það besta fram í mönnum og á sama hátt og Borgar er hún dugleg að miðla fróðleik og upplýsingum um land og þjóð. Við vonum svo sannarlega að okkur gefist tækifæri til að fara oftar með Borgari og Elínu til Afríku. Það hefur verið algert ævintýri að ferðast með Afríku Ævintýraferðum. Við mælum hiklaust með ferðunum þeirra. Górilluferð með Afríku Ævintýraferðum er sannkallað ævintýri.

Við höfum farið tvær ferðir með Afríku Ævintýraferðum þar sem blandað var saman fjallgöngu og safari. Fjallið Kilimanjaro dró okkur að lokum til Tanzaníu og svo Kenya en það land hefur verið á óskalista lengi. Gangan, þjóðgarðurinn og keyrslan til austurstrandarinnar undir frábærri leiðsögn ykkar rennur aldrei úr minnum. Burðardrengirnir á fjallinu, örugg leiðsögn fararstjóra þar, kyrrðin og lyktin á áfangastað í Serengati þjóðgarðinum, frábær gróðurvin þar sem dýrin hittust við vatnsdrykkju og það að keyra í opnum trukk á misjöfnum vegum Kenya og það sem fyrri augu bar á þeirri leið gleymist ekki. Ykkar frábæra fararstjórn í þessum ferðum þar sem fer saman góður undirbúningur, kunnátta og öryggi og án þess að stjórna fólki um of lætur manni líða vel. Seinni ferðin var sniðin eftir óskum okkar og leiðbeiningum ykkar og stóðst fullkomlega þ.e. farið var á Mt. Kenya sem er fallegt fjall og síðan í þann þjóðgarð sem stendur upp úr sem er Masai Mara þjóðgarðurinn (höfum einnig farið í Kruger þjóðgarðinn í Suður Afríku sem er mjög frægur en kemst ekki með tærnar þar sem Masai þjóðgarðurinn hefur uppá að bjóða). Þar var lífið okkar kryddað með því að sjá dýrin í loftbelg og skyldi enginn láta það fara fram hjá sér fara sem hefur tækifæri til þess að svífa um loftið í loftbelg í morgunsólinni og skála síðan í kampavíni með morgunmatnum framreiddum á rauðum dúk meðal fíla, zebrahesta, gíraffa og ljóna, stórkostlegt. Síðan er vinátta ykkar við Masai þjóðflokkinn einstök og fengum við að njóta þess að fara í göngutúr með þeim og spjalla við þá í þeirra umhverfi, það var eins og draumur. Annars er fólkið í Kenya það sem stendur uppúr í þessum ferðum, alls staðar mikil gestrisni og kurteisi í okkar garð. Ferðir ykkar kryddaðar af óvæntum uppákomum eins og heimsókn á munaðarleysingjahæli barna með alnæmi og heimsókn í kofa Masai manna, þetta gleymist aldrei.

Ég fór til Afríku því ég var að leita að einhverju öðruvísi sem ekki snerist um að liggja á strönd allan tímann og mig langaði að upplifa eitthvað framandi, spennandi og öðruvísi. Það sem heillar mig mest við Afríku er fólkið, menningin, dýralífið og fjölbreytt landslag. Það land sem heillar mig mest af þeim sem ég hef komið til er Uganda og var það aðallega fjölbreytnin, mikið að sjá en ekki allt krökt af ferðamönnum. Fararstjórnin var mjög góð og persónuleg,vandamál eru ekki til. Ég er búin að fara á 2 fjöll þ.e. Mt. Kenya og Kilimanjaro. Það sem gerir fjallgöngur í Afríku sérstaklega skemmtilegar er fjölbreytt landslag (oft í gegnum flest gróðurbelti heims) og dýralífið á leiðinni. Það er vægast sagt frábært að ferðast með Afríku Ævintýraferðum, vel skipulagðar ferðir og fjölbreyttar. Ég hef nú þegar farið í 4 ferðir!

Ferð mín til Kenya með Afríku Ævintýraferðum var ekki bara eitt mesta ævintýri sem ég hef farið í heldur líka virkilega skemmtilegur og gefandi skóli. Þessi ferð stóðst allar mínar væntingar og miklu meira en það. Fararstjórarnir voru frábærir og vissu nákvæmlega hvað þeir voru að tala um og það stóðst allt sem sagt var. Það sem er mér eftirminnilegast er að hafa fengið að heimsækja Nyumbani munaðarleysingjarheimilið í Nairobi sem og Masai og Digo ættbálkana. Magnað að fá að sjá hvernig þau lifa, þar sem maður gerði sér enga grein fyrir að svona lifnaðarhættir væru enn til.

Í febrúar 2008 fór ég í sannkallaða ferðaveislu með kenýsku ferðaskrifstofunni Afríka Ævintýraferðir. Ég hef ferðast víða um heim en komst í kynni við Afríku árið 2007 þegar ég fór í ferð til Kenya með sömu aðilum og heillaðist. Ég var varla komin heim fyrr en að ég pantaði aðra ferð með þeim og þá til Uganda og Rwanda að skoða fjallagórillur. Ég fæ ótrúlega mikið út úr svona frábærum ferðalögum og óska öðrum að fara í slíkar ferðir. Við fórum m.a. og skoðuðum fjallagórillur í Rwanda og það var þvílík upplifun að komasta svona nærri þeim, ”ég sveif á bleiku skýi” þrátt fyrir að þurfa að ganga í marga klukkutíma í gegnum þykkann regnskóginn. Einnig stóð upp úr að fara á Þjóðarmorðssafnið í Kigali í Rwanda. Mér finnst að fólk eigi að vita af þessum hörmungum sem gerðust þar árið 1994, ekki að loka á það. Mér finnst Afríka alveg meiriháttar heim að sækja, þau toga í mann þessi lönd, svo einstaklega falleg eins og t.d. Uganda og Rwanda. Að komast í námunda við dýrin í sínu náttúrulega umhverfi það gefur mikið og maður safnar að sér svo góðum minningum í ferðasarpinn. Ferðin okkar var vel skipulögð af þeim Elínu og Borgari og gaman að ferðast með svona góðu fólki. Ég er alsæl og væri til í aðra Afríkuferð hvenær sem er...

Það sem heillaði okkur mest var hversu fólkið er nægjusamt, glaðlynt og stolt af landi sínu og þjóð. Eflaust svipuð tilfinning og Karen Blixen fann fyrir á sínum tíma þegar hún heillaðist af Kenya. Tveir innfæddir leiðsögumenn fylgdu okkur í þessari ferð sem voru mjög fróðir og færir í sínu fagi. Annar þeirra hét Kornelíus, einstaklega brosmildur og mikið prúðmenni. Hann átti stóran þátt í að gera ferðalagið ógleymanlegt í alla staði, var alltaf til staðar en vissi hvenær hann átti að draga sig í hlé. Hinn.....[Rashid] tók á móti okkur í Mombasa og fræddi okkur um þessa sögufrægu gömlu borg. Það er fyllilega hægt að mæla með Afríku Ævintýraferðum og vonandi eigum við eftir að fá tækifæri til að ferðast með þeim aftur. Borgar og Elín veita trausta og persónulega þjónustu og leggja sig fram við að uppfylla óskir og væntingar ferðamannsins. Allur undirbúningur og skipulagning fyrir ferðina var til fyrirmyndar í alla staði. Við fengum ítarlegar og góðar upplýsingar áður en ferðin hófst sem stóðust fullkomlega. Þessi ferð var sniðin að óskum okkar og fór fram úr þeim væntingum sem við lögðum af stað með í byrjun.Ferðin var eitt ævintýri frá upphafi til enda og það var svo margt sem við upplifðum á hverjum degi. Við fórum í loftbelg um sléttur Masai Mara þjóðgarðsins og horfðum á sólarupprás þar sem dýrin voru að gæða sér á nýveiddri bráð. Þessari upplifun er erfitt að lýsa með orðum en okkur fannst við vera staddar í bíómynd eftir að við lentum stutt frá ljónununum og fengum dýrindismorgunverð á dúkuðum borðum sem við skoluðum niður með kampavíni. Heimsókn í þorp Masai Mara þjóðflokksins hafði djúpstæð áhrif á okkur og við urðum fyrir menningarsjokki en jafnframt reynslunni ríkari. Markaðurinn í Mombasa og gönguferðin í borginni vakti athygli okkar en þegar að við horfðum á fólk leita sér að mat í öskuhaugunum þá fannst okkur Masai Mara fólkið hafa það nokkuð gott í samanburði við marga aðra. Sömu sögu er að segja um HIV smituðu börnin sem við heimsóttum á munaðarleysingjahæli í Nairobi í upphafi ferðar. Þau höfðu fleiri tækifæri og möguleika á menntun og betra lífi en jafnaldrar þeirra sem bjuggu í fátækrahverfum Kenya. Að lokum langar okkur að þakka Afríku Ævintýraferðum fyrir að láta draum okkar verða að veruleika : )